«Харчы. Иэстэбил». Киинэ туһунан санаалар

Бэҕэһээ Саха НКИХ оҥорбут «Харчы.Иэстэбил» диэн киинэ биһирэм көрдөрүүтүгэр сырыттыбыт.Киинэ ахсынньы 7 күнүттэн киэҥ экраҥҥа, Саха сирин бары киинэ тыйаатырдарыгар тахсар. Биһиги дьоммут, биир идэлээхтэрим маҥнай сериал оҥорон баран, киинэтаҥар албастаммыттар. Голливуд киинэ оҥорон баран, сериаллары таҥарын билэҕит.

Икки сыллааҕыта  Саха НКИХ салайааччыта Олег Марков итинник былааннааҕын кэпсээбитигэр, итинник табыллыаҕын санаабатаҕым. Былырыын «Мин таптыыр спутнигым” сериал кэннэ “Күн оҕото Күннэй» киинэ тахсыбыта.Сериаллар сулууспалара (салайааччы Марфа Пермякова), режиссердар, оператордар, тыаһы-ууһу таҥааччылар идэтийэн, сатабыллара сатанан, Россия, аан дойду таһымнаах киинэлэри кыттар күрэстэһэр буолбуттара астык. Елена Эверстова бу улахан экраҥҥа тахсыбыт иккис киинэтэ.

Киинэни бэркэ сэргээн, астына-дуоһуйан, долгуйан, уйадыйан, биир тыынынан көрдүбүт. Тоҕо диэн ыйытыкка маннык эппиэттиэм:

Бастатан туран, итинник жанрга, сахалыы триллер диэххэ, итэҕэтиилээхтик киинэ өссө уһулла илик быһылаах. НВК-лар ону кыайбыттар. Киинэ түргэн-тарҕан, барыта өйдөнөр. Күүтүллүбэтэх, көһүппэтэх түгэммит эмискэ күөдьүйэр. “Оо!”, — эрэ диибит. Сорох биир дойдулаахтарбыт, «сахалар инник гымматтар» эҥин диэбэтиннэр. Киинэ аата киинэ. Голливуд киинэлэригэр баар иэстэбил, иэстэһии төрүөтэ манна эмиэ көстөр. “Бэйэтиттэн буолбакка, бэдэриттэн” диэн ынырык тыллар иһиллэр курдуктар.

Иккиһинэн, артыыстар олус итэҕэтиилээхтик оонньууллар. Сериалга Сандра Жегусова оруолун бэккэ арыллан оонньообута. Бу сырыыга кылаабынай геройу, Байдамы сөбүлээтим (Андрей Соловьев). Аны сериалы көрбүт буолан, бэккэ билэр дьоҥҥор дуу, аймахтаргар дуу, доҕотторгор дуу курдук сыһыаннаһар эбиккин. Онон киинэни быһа ол дьоммор ис сүрэхтэн “ыалдьа” олордум.

Үсүһүнэн, киинэ үөрэтэр-такайар. Мээнэ сүпсүлгэн буолбатах.  Ол түөкүннээһин эрэ диэн буолбакка, “аньыы-хара барыта сэттээх-сэлээннээх” диэн уу сахалыы өйдөбүл баар. Аны туран, «дьону сэнээмэ», “бэйэҕин үрдүктүк сананыма” диэн мээнэҕэ эппэттэр. Уонна, биллэн туран, бэйэҥ дьоҥҥор харыстабыллаахтык сыһыаннас. Сериал (сценарий Евгения Давыдова) уонна киинж кэнниттэн саха дьоно түөкүннэргэ түбэһэллэрэ аҕыйыыра буолуо. Киинэҕэ Ис дьыала уорганара сүбэ-ама буолбуттар биллэр. Подполковник Чемезов кэлэн сүрэхтэниигэ махтал тылын эттэ. 

«Харчы. Иэстэбит» атын саха киинэлэрин курдук, саха дьонун сырдыкка талаһарын курдук кэрэнэн түмүктэнэр. Онон барын көрүҥ.