Биикигэ күрэс ыытыы туһунан
Уопсайынан Бикипиэдьийэҕэ, ол иһигэр энциклопедия сахалыы салаатыгар, кэмиттэн кэмигэр ыстатыйа суруйууга күрэстэри ыытабыт.
Холобур, хаһан эрэ өрдөөҕүтэ «Харчы» диэн ааттаах күрэһи ыытан турабыт. Бирииһи атаһым, ол саҕана урбаанньыттыы сылдьыбыт Никииппэр Уйбаныап туруорбута. Кини бэйэтэ ааттаах коллекционер, нумизмат. Эбэтэр, Гуманитарнай чинчийэр институуттуун кэпсэтэн баран саха учуонайдарын тустарынан күрэс ыыппыттаахпыт.
Күрэс туохха туһалааҕый? Билэргит курдук, Бикипиэдьийэҕэ суруйуу босхо. Эйиэхэ да харчы төлөммөт, эн да туһанарыҥ эбэтэр суруйарыҥ иһин харчы төлөөбөккүн. Оттон күрэскэ бириис тутан хайдах эрэ хамнастанар курдук буолуоххун сөп. Холобур, биир кыттааччыбыт харчынан бириис тутан баран ноутбук ылыммытын билэбин. Ол эрээри, биир бэйэм ити өрүтүн оччо сөбүлээбэппин, бириис эрэ туһуттан суруйар дьону төһө да сүөргүлээбэтэрбин, атын кыттааччылары арыый үрдүктүк тутабын.
Дьиҥэр, биики-күрэс атын соруктаах — бастакытынан, ханнык эрэ баччааҥҥа диэри үчүгэйдик сырдатылла илик тиэмэҕэ болҕомто тардыы (энциклопедия бары өттүнэн толору буоллаҕына дьон ааҕар буолар), иккиһинэн саҥа кыттааччылары суруйарга угуйуу (тоҕо диэтэххэ үгүс дьон «кэлин, үчүгэйдик бэлэмнэнэн баран суруйуом» дии сылдьаллар, устунан умнан кэбиһэллэр, оттон күрэс болдьохтоох буолан, хабыыт суруттарар 😉 )
Бу сотору кэминэн «Биики-Саас» диэн ааттаах омуктар ыккардыларынааҕы күрэс ыытаары сылдьабыт. Омуктар бэйэлэрин дьоннорун, устуоруйаҕа буолбут түгэннэрин, култуураларын иҥин туһунан ыстатыйа суруттараллар, биһиги Сахалыы Бикипиэдьийэбитигэр. Оттон биһиги эмиэ ыстатыйалар испииһэктэрин омуктарга биэрэн, биллиилээх дьоммут туһунан, Саха сирин туһунан ыстатыйалары омуктуу суруттарыахтаахпыт. Бу Саха сирин туһунан омуктар билэллэригэр, онон кэлин бэйэбитигэр, ыччаппытыгар туһалаах буолара биллэр.
Онон, доҕоттоор, кэтэһиҥ. Сотору күрэһи биллэриэхпит.
Уонна тиһэххэ кыра угуйук: Күн аайы Бикипиэдьийэҕэ бүгүн туох буолбута тахсар салаалаах. Ол салааҕа болҕомто тардар соруктаах телеграм-ханааллаахпыт. Аата «Биики Халандаар». Онно сурутаргытыгар ыҥырабын: https://t.me/biikige
